Baie van ons het mettertyd ’n versmalde beeld van Jesus gevorm, asof Hy net ’n Verlosser is, en nie ook ons Leermeester en Lewe self nie. Die verwondering oor Hom het plek gemaak vir ’n vae of selfs vervelige geloofsbelewenis. Die hart van die Christelike geloof, om eerstehands met Jesus te leef, het mettertyd begin verdof. Sy stem, Sy wysheid, Sy teenwoordigheid het in baie kerklike ruimtes stil geraak.

Ons weet dalk baie van geloof, maar daardie kennis bring nie noodwendig innerlike verandering nie. Ons leef maklik verby onsself, sonder selfkennis of emosionele volwassenheid, en dit beïnvloed elke verhouding. Intussen sit ons vas in gewoontes wat nie lewe gee nie, en ons weet nie altyd hoe om werklik te verander nie. Ware karaktertransformasie gebeur nie outomaties of onder verdowing nie. Dit vra bewustheid, begeleiding en ruimte om gevorm te word, geduldig, eerlik en saam met ander.

Daarom bestaan Geloofsvorming: om ’n ruimte te skep waar ons nie net glo nie, maar gevorm word, saam met Jesus, saam met mekaar. En jy’s welkom om saam op reis te kom.